राष्ट्रिय स्वतन्त्र पार्टी (रास्वपा) ले प्रत्यक्ष निर्वाचनमा जित हासिल गर्न नसकेका ४० निर्वाचन क्षेत्रमा समानुपातिक सांसदलाई जिम्मेवारी तोकेको छ।

फागुन २१ मा सम्पन्न निर्वाचनमा पार्टीले प्रत्यक्षतर्फ विजय प्राप्त गर्न नसकेका क्षेत्रहरूमा यस्तो जिम्मेवारी बाँडफाँट गरिएको हो।

पार्टीका महामन्त्री कविन्द्र बुर्लाकोटीका अनुसार ती क्षेत्रमा रहेका जनसमस्या र मागहरू प्रभावकारी रूपमा सम्बोधन गर्न सहज होस् भन्ने उद्देश्यले समानुपातिक सांसदलाई जिम्मेवारी दिइएको हो।

उनले प्रत्यक्षतर्फ हार व्यहोरेका क्षेत्रहरूलाई बेवास्ता नगरी निरन्तर समन्वय र काम अगाडि बढाउने रणनीति अन्तर्गत यो निर्णय गरिएको स्पष्ट पारे।

रास्वपाले उक्त ४० निर्वाचन क्षेत्रमा समानुपातिक सांसदहरूको सूचीका आधारमा जिम्मेवारी निर्धारण गरेको जनाएको छ।